گلچینی از بهترین دوبیتی های ناب از شاعران ترک زبان
ســاقی دولانیـــم باشینـــا مئی جامینی گزدیر
سرمســـت اولـــوم، باشیمــا میخانه دولانسین
علی آقا واحد
فــراقـی چکمــه یـن عــاشیـق، وصالین قدرینی بیلمز
جمیـــله اولمــایـــان واصیــل، جمــالین قــدرینی بیلمز
نسیمی
خاقـانـی‌اؤز عشقینده ثابیت قدم اول جان قوی
باش گئتـمه سه بویولدا وصلینی قازانمازسـان
خاقانی شروانی
حبّذا مجلسیمیز اهل صفا مجلیسیدور
محفل ذوق و صفادور، عرفا مجلیسیدور
بلبل و غنچه بشکفته و پروانه و شمع
جمله حاضردی حقیقت شعرا مجلیسیدور
کریمی مراغه ای
گـؤرمیــروخ گـــؤر نه زامــاندیر گـــؤزه جانانیمیزی
ای کـــــؤنول آلدیلار الـــده ن غَمــــه درمانیمیزی
سجـده گاهیــــدی اونون طرّه ی افشـــانی بیزه
ایتیــریب قبلــه نی گـــؤر نئینـه دیغ ایمانیمیزی!
حامد مرادی(وامق)
سوزلریم یازدیم داغا سیل تک آخدی گوزی
موج ویردی ساحله دریا کی بیلدی او سوزی
دوشدی طوفان عالمه بیلدی اورکده دردمی
عالم دوشدی بوران گوردی ناله های سردمی
دویموری چرخ فلک جور و جفادان چوخ شوکور
چکمیر ال مدتدی بیز بختی قارادن چوخ شوکور
الده توتموش بیر تیکه شور زیغ چؤره ک ظالیم فلک
قارشیلیق بیر یکه جان ایستیر گدادان چوخ شوکور
معجز شبستری
ای فلک چک دالییا گونلری رحم ایله منه
ممکن اولسا او کوچن بولبولو قایتارچمنه
بو گونون باش یازیسیندان خبریم اولسایدی
یالواراردیم گونشه باتمادایان قال دونه نه
محمد هاتفی عین الدین
قویمادی بیر کیمسه نین یانسین چــراغی روزگار
چوخلو طویلاریاس اولوب الده ن حنالر گئتدیلر
سنده ایی دل اولگیلان آماده بیر گون گئتمگه
بی وفا دنیانی بوشلا باوفــــــــالر گئتدیلر
شهودی بستان آبادی
فله‌گین داد الینده‌ن
اوْلمادێم شاد الینده‌ن
یامان یئرده یێخێلدێم
تۇتمادێ یاد الیمده‌ن
بیچاره گوزوم هرگجه سن سیز باخار آغلار
قان یاشیله اولدوزلاری بیر بیر سایار آغلار
سن آیریلیقی خوشلادون اما گجه گوندوز
دفترده قلم شرح فراقون یازار آغلار
پیران قیداری
تا کی گوزلر ساتاشدی گوزلرینین قاره سینه
دوزدی غمزه اوخونون یاره‌سی، کار ائتدی منه
الهامی علمداری
یولوندا انتظار مقدمینله خاک اولان چوخدور
خرام ائت بیر قدم، من خاکساری سرفراز ائیله
فضولی! جانه تاپشیردین خیالین، ایندی رسواسان
سنه کیم دئیرکی هر نامحرمه، افشای راز ائیله
مولانا محمدفضولی
نئچه ایل دیر کی گونش تار گلر اولکه میزه
یاز گونی – باهار گونی قار گلر اولکه میزه -؟
اوزوم‌ده یاسلی گوزوم‌ده سوزوم‌ده شعریم‌ده
آچیق دئیم ساوالان داغلی‌یام نه ائتمه‌لی‌ام
عاصم اردبیلی
هیجران گئجه سی، من چکنی چکمه سین اغیار
ظننیم جه قیامت گونو بوندان بتر اولماز
زولفون اوزونو توتسادا، گویچک لیگین آرتیر
ظلمت گئجه لر اولماسا آیدین سحر اولماز
واحد
قوی اوپوم گوزلرووی بلکه اورک دینجل‌سین
سن ده بیر کلمه دانیش منده دیلک دینجل‌سین
شریفه جعفری
برق اولمادی قیزیم گئجه یاندیردی لاله نی
پروانه نین ، اودم ده باخیر دیم اداسینه
گؤردوم طواف کعبه ده یاندیقجا یالواریر
سؤیلور : دؤزوم نه قدر بو عشقین جفاسینه ؟
شهریار
بولاق بولاق قورویوب بختیمین ایشیق گؤزه‌سی
قارانلیغا بورولان کور شلاله‌دن یازیرام
کاظم نظری – بقا
رنگی سولموش خزلم یللره تاپشرما منی
گوز یاشیمدان توکولن سللره تاپشرما منی
آند اولا الله ها بیرگون دوزه بیلمم سن سیز
آی لارا،هفته لره،ایل لره تاپشرما منی
پیران قیداری
ایل کئچدی، باهار اولدو، خبر یوخ گولوموزدن،
گول آچمادی، قووزانمادی سس بولبولوموزدن.
بایرام گونوموز، یاسلى گؤروشلرله کئچر کن،
شادلیق نه اوماق بیز آییمیزدان ایلیمیزدن
شهریار
شمعی صوندور دخی پروانه کی یاریم گلدی
گوله باخ آغلا بولوت نازلی نگاریم گلدی
نظامی گنجوی
اگرچه ایینه تک کئچدیم جهانین جمله وارین دن
هنوز آردیمجادیر قید تعلق، زلف تارین دن
شهید عشق اولوب فیض بقا کسب ائیله مک خوشدور
نه حاصیل بیوفا دهرین، حیات مستعارین دن
محمد فضولی
مجنون ایله من مکتب عشق ایچره اوخوردیق
من مصحفی ختم ائتدیم او “واللیل” ده قالدی
ناوک غمزون ایچر قانیمی ای قاشی کمان
چشم مستون کیمی مخموردو، پیمانه ویرار
یانارام آتش هجرانووه باک ائیلمرم
شعله ی شمعه اؤزون رسمدی پروانه ویرار
صراف تبریز
بارالها سن اوزون دوشمنی می شاد ائیله
عومرون آرتیق ائله ییب منزلین آباد ائیله
یولوما سپسه تیکان هر کس اولا غم وئرمه
یولونو گولشن، اوزون سروتک آزاد ائیله
حسین نجفی- شادی
سینه بیر دشت مغان دیر، قوزی یان- یانه یاتیب
منیم آغلار گوزومی اوردا آراز ایله میسن
استاد شهریار
ساقی دولانیم باشیوا پیمانه دولاندیر
اخم ایلمه ناز ایلمه مستانه دولاندیر
مال ایستمیرم طالب شهرت دیرم من
یا رب قلان اوقاتیمی مردانه دولاندر
مریده بنده‌ی پیر مغانم، عشق فیضیندن
نه ایسترسه‌م، اولور میخانه‌لرده مستجاب ایندی
علی آقاواحد
گوزلرین آچ بیر گئجه تا من گوروم میخانه نی
دونیانی ترک ایلییپ من دولدوروم پیمانه نی
وفا
نه گوزلدی کی قمارباز اوتوزا نه وارسا الده
نه قالا ائوینده بیرزاد نه قالا اومیدی چولده
نه گوزلدی کی قمارباز اوتوزا آخیردا باشین
نئجه منصورون قالیبدی هله «شادی» آدی دیلده
حسین نجفی- شادی
عاشیقه بیر گون دئدیم ترک ائله او یاری ، دئدی
بیلمیسن عشق آتشی له یاندیریپ غمخانه نی؟
هامینی ترک ائلرم هر کیمسه واردیر دونیادا
اما من ترک ائدمرم او ساقی دوردانه نی
وفا
نئجه خنجر دمینده مرغ بسمل اضطراب ائیلر
منیم کؤنلوم قوشی سندن اؤتور اوندان بتر تیترر
صراف تبریزی
دؤزموشم او قدر هیجرانه ، دؤزومدن کوسموشم
اوزموشم امید وصلیندن ، اوزومدن کوسموشم
اویموشام ایللر بو ظاهربین گؤزون فیتواسینه
ایری لر دوز گؤزموشم از بس ، گؤزومدن کوسموشم
عاصم اردبیلی
یاز قلم یاز. بو کونول پاسلی دمیرتک چورودی
توزلی طوفانه دوشوب . عشقیمی طوفان بورودی
بیر سینیخ کشتی کیمین هی آخارام ساغ سولوما
ناخدا عشقیم اولوب هر یره سویدی سورودی
هر قارا زولفون اسیری اولمارام بوندان سورا
ایندی عالم اوزگه‌دیر، خوش روزگار ایستر کونول
علی آقا واحد
کؤنول کؤنول سیزه غوربت‌ده ناله‌دن یازیرام
سینیق سینیق آیا، ایوان‌دا هاله‌دن یازیرام
آران‌دا بولدوزرین قانلی قیناغین گؤروره‌م
چمن چمن پوزولان غملی لاله‌دن یازیرام
کاظم نظری- بقا
بی غیرت آدام قصرده اگلش‌سه ده آنجاق
زندان‌دا شهامت‌له یاتان دوستاغا دگمز
هر بیر یاراماز قولدورا تعظیمه‌انن باش
ظالم باشینا اندیریله‌ن توخماغا دگمز
علی عسگر صادقی
بیر قدح می ایسته دیم، سیندیردی کونلوم شیشه سین
داش باغیرلی ساقی صاحب جفادان کوسموشم
چون اومان یئردن کوسرلر بیر مثل دیر خلق آرا
کوسدوگیم بیجا دگیل دیر آشنادان کوسموشم
ملاپناه واقف
بحر بی پایانه شوقـون جـــانیمـــی غــــرق ایلــــه دی
گـــؤر نـــه بیـــداد ایله دی هجرون نه طوفان اولدی گَل
بو نسیمـــی سنـــدن آیــری بیلــدیگیـم یوخدور وجود
درد و درمان، وصل و هجران، جمله یکسان اولدی گَل
نسیمی
هـــاردا دیــوانه ساچیـــن تـــاجـــه بــرابـر بیلسـه
اوردا شاهنـان گدانیـن فرقینی اینسان بیلـمــه ز
صائب تبریزی
دئدیم ای گول من ازلدن ده گوزل عاشیقی یم
دئدی سن روحونو عشقیـله جوان ایله میسن
دئدیم هر گون سر کویونده دولانماقدیر ایشیم
دئدی واحد نه گوزل یئرده مکان ایله میسن
واحد
من که درویش اولموشام، شاها، جهاندان فارغم
بنده ی سلطان عشقم، این و آندان فارغم
نسیمی
افسوس کی، یاریم گئجه گلدی، گئجه گئتدی
هئچ بیلمه دیم عمروم نئجه گلدی نئجه گئتدی
آغابیم آغاباجی
ساتمیشام من باغ رضوانی،” نباتی” ، بیر جؤوه،
بو جهان مولکون سراسر آلمایام بیر دانگه من
سیدابوالقاسم نباتی
جــان و دل قیــدینــی چکمکـدن ئوزوم قورتاردیم
جــانی جـــانـــانییـــه ائتـــدیم دلــی دلـــداره فدا
نسیمی
آییملماز جهل اهلی، “واحد”، هرگز خواب غفلتدن
مگر اهل ریادن ترک اولار افسانه لر بیر بیر
علی آقا واحد
قلــبـــه درمـانـدی یارین صف – صف اولان مژگانی
دامــاریــن دردینــی نئشتر کیمی ، درمان بیلمه ز
صائب تبریزی
بزم آرا قیل بیر ایشاره خلقدن پئنهان منه
تا دوروب پروانه تک بیردن دولانیم باشیوا
حئیران خانم
ای کؤنول عمرومو وئردین یئله ، عاشق لیگ ایـله
باخمـــا هـــرغنچـــه لـب و گلـرخه، آه ائتمه داهی
باخـما ای جـان ، خـط ِ رخساریـنه محبوب لـرین
احتیــاط ایــله ، گنـــاه اوزره گنـــاه ائتمــه داهــی
مولانا محمد فضولی
بیر جانیم وارایدی ای شوخ کی آلدین
او زمان ئوزگه جان داخی بو بی کسده گمان ایلمیسن
قاشلارین تیغ سیتم آلمیش اله، کیرپیگین اوخ
یولدوروبسن منی ناحق یئره قان ایلمیسن
حئیران خانوم
حالیم گینه چوخ اولدی یامان، ای ساقی،
قوربانین اولوم بسدور امان، ای ساقی،
کؤنلوم ائونی لشکر غم ائتدی خراب،
وئر باده کی، باغریم اولدی قان، ای ساقی
سیدابوالقاسم نباتی
گؤزون مردملری سرمست اولوب، تؤکمک دیلر قانیم،
دوزوبدور هر طرف پیکان، عجب خونخواره بنزتدیم
خورشید خانوم ناتوان